تعليم واري وزير به ڪاپي روڪڻ کان جواب ڏئي ڇڏيو!
ڪجهه ڏينهن اڳ سنڌ جي تعليم واري وزير ڄام مهتاب ڏهر جو بيان پڙهڻ لاءِ مليو، جنهن ۾ هن چيو آهي ته تعليمي ادارن ۾ ڪاپي کي روڪڻ ڏکيو آهي ۽ هو ڪاپي ڪندڙن اڳيان مجبور آهي. ٻيو ته ٺهيو تعليم وارو وزير به ڪاپي نٿو روڪرائي سگهي. مون کي انهي تي 1988ع ۾ سنڌ جي وڏي وزير قاضي اختر پاران ڏنل بيان ياد آيو، جنهن ۾ هن حڪم جاري ڪيو هو ته ڪنهن به ضلعي جي اسڪول ۾، جيڪڏهن ڪاپي ٿئي ته ان جو ذميوار ڊپٽي ڪمشنر هوندو. چون ٿا ته ان سال سنڌ ۾ وڌ ۾ وڌ شاگرد امتحان ۾ فيل ٿيا هئا. اسان مسئلن تي ضرور سوچيندا آهيون پر انهن جي سببن تي گهٽ ئي سوچيندا آهيون. اسان وٽ امتحان شروع ٿيڻ وارا آهن. وزير تعليم طرفان روايتي طور قلم 144 لاڳو ڪرڻ جو به اعلان ٿيندو، ڪجهه شاگردن تي ڪاپي ڪيس به ڪيا ويندا پر، ان ڪلچر کي روڪڻ لاءِ ڪو جٽادار حل نه ڪڍيو ويندو. سڄي تعليمي سال دوران ڪلاسن ۾ هفتيوار، پندرنهن روزه يا وري ماهوار ٽيسٽ وٺڻ جو ڪو نظام ناهي. استاد مضمون پڙهائڻ دوران گائيڊ جو سهارو وٺندا ته شاگرد انهن کي ڏسي ڇا پڙهندا؟ استادن جي اڪثريت ڪلاسن ۾ تياري سان نٿي اچي. جڏهن استادن کي پڙهائڻ جي تربيت ئي نه مليل هوندي ته اهي سٺو ڪيئن پڙهائي سگهندا؟ الف اعلان جي آيل رپورٽ موجب سنڌ ۾ 70 سيڪڙو ٻارن کي سنڌي صورتخطي لکڻ به نٿي اچي. اهو آهي اسانجو تعليمي معيار.
0 comments:
Post a Comment